Pesta Pernikahan Adat Batak Toba

Hata Jambar

Mauliatema tadok tu Amanta Debata Pardenggan Basa I, ala asi dohot holong ni rohaNa, dipairing-iring hita sahat tu tingkion. Ruhut paradaton ni halak Batak mansai timbo jala tung denggan do. Ai molo adong ulaon ada, atur do idaon diparhundulon, atur dipartuturon, atur dipanghataion jala atur diparjambaran. Sai marumpasa do angka na malo mandok hata, tabo begeon, ai umpasa i do songon sira ni hata i.

Alai lomos ma roha, ai nunga marsalpuan angka natuatua na malo jala paradat. Hita pe, tarlumobi angka na umposo, hurang do mangharingkothon laho manguhal adatnta na uli i. Ai molo tarajumi saonari on, nunga lam bahat sian hita na so umboto tangkas adat batak i, i do umbahen na tubu sipata parsalisian molo adong ulaon adat. Adong do nian umpasa ni ompunta na mandok : "Di dia tano hinundulan, disi do langit jungjungon Didia di pamasa ulaon i, asa nasida do siihuthononhon". Lapatanna sai sidapot solup do na ro. Unang sai tubu parsalisian di na laho mangulahon adat, nunga lam marbisuk jolma, ai nunga sai jolo dibahen tonggo raja/ ria raja andorang so mata ni ulaon i. Di tonggo raja/ ria raja i ma dipasingkop na hurang singkop, jala patotahon na hurang tota, asa dapot songon ni dok ni natuatua :"Aek godang tu aek laut, dos ni roha sibahen na saut". Unang apala ndang ta boto adatnta, husurat hami do manguhal huhut manusun deba ruhut paradathon na ringkot songon sitioponta, alai ndada mandok on na ma na sumintong. Songon hata ni natua tua mandok :

"Rata pe bulung ni salak, rataan do bulung sitorop.
Uli pe hata ni sisahalak, ulian do hata na torop"

Dihilala rohanami godang do pe hahurangan panorangion taringot paradaton on, ala ni i, rap ma hita padengganhon, asa adong na gabe sitiopon di hita lumobi tu angka na umposo. Songon hata natua tua mandok :

"Asa tubu ma dingin dingin, jonok tu sirpang tolu,

Sai horas tondi madingin, pir tondi matogu"

Dihita saluhut halak batak lumobi di angka na umposo, dasar ni adat bataknta ima "Dalihan Na Tolu":  i ma  " Somba Marhula hula, Manat Mardongan Tubu, Elek Marboru". Adong deba na mandok, ondolan ni partuturon i, "Dalihan Na Tolu Paopat on Sihalsihal" (ale ale, dongan sahuta, raja ni nigokhon dohot pangula ni Huria). Toho do i, alai molo adong siulaon, parhundul ni sihal sihal tongtong do rap dohot dongan tubu.

Hagabeon, hasangapon dohot hamoraon, i do diparsinta halak batak di ngoluna, jala sai na lehonon ni Tuhanta do i asal ma somba (unduk manang pantun) marhulahula, manat mardongan tubu, jala elek marboru. Parngoluan ni halak batak, sian na tubu, magodang, hot ripe sahat tu ujung ni ngoluna, di las roha manang arsak ni roha, tarihot do tu adat na pinungka ni ompunta sijolojolo tubu. Songon hata ni natuatua mandok :

" Raja i jolo martungkot siala gundi

Adat na pinungka ni ompunta na parjolo,diihuthon dipudi"

Di panuraton, ia pajojor ni ulaon di na pangolihon anak manang pamuli boru na ni enet sian angka referensi dohot na binereng sian adat na hea diihuthon ni panurat, ima :

1.  Patua Hata (Marhori hori Dinding)
2.  Marhusip
3.  Martumpol Dohot Marpudun Saut
4.  Martonggo Raja
5.  Marunjuk / Pesta Unjuk

Songon ni ma ulaon adat na pangolihon anak manang pamulihon boru. Asa ta boto songon dia pardalan ni ulaon i, boi ma ta bereng di alaman "DISON" (klik ma)